Abdusattorov rapid baxslarini muvaffaqiyatsiz yakunladi
Xorvatiyaning Zagreb shahrida o‘tayotgan “Grand Chess Tour” turkumidagi SuperUnited Rapid & Blitz Croatia musobaqasining rapid qismi yakunlandi. Ushbu nufuzli turnirda jahon shaxmatining yetakchi nomlari — Gukesh Dommaraju, Magnus Karlsen, Fabiano Karuana va boshqalar qatorida hamyurtimiz Nodirbek Abdusattorov ham ishtirok etdi.
To‘qqiz turlik rapid baxslari yakuniga ko‘ra, Gukesh Dommaraju 14 ochko to‘plab chempionlikni qo‘lga kiritdi. Yan-Krishtoff Duda (Polsha) 11 ochko bilan ikkinchi, Magnus Karlsen (Norvegiya) esa 10 ochko bilan uchinchi o‘rinni egalladi.
Abdusattorov esa rapid yo‘nalishini muvaffaqiyatsiz yakunladi — u 9 partiyada 6 ochko jamg‘ardi (2 g‘alaba, 4 durang, 3 mag‘lubiyat) va 10 nafar ishtirokchi orasida oxirgi o‘rinni egalladi.
Shu kuni u Yan-Krishtoff Duda, Magnus Karlsen va Alireza Firuzjaga qarshi uchta durang qayd etdi.
Eslatib o‘tamiz, rapid baxslarida g‘alaba uchun 2 ochko, durang uchun 1 ochko beriladi.
Ertangi kundan boshlab musobaqa blitz (tezkor shaxmat) turi bilan davom etadi. Unda 18 turdan iborat jadal baxslar o‘tkaziladi.
