1-Central Asia drifting cup. Ўзбекистон жамоасининг натижалари
25–27-сентябрь кунлари Қозоғистондаги Sokol International Circuit автодромида тарихда илк бор FIA Central Asia Drifting Cup мусобақаси бўлиб ўтди. Турнир юқори ташкилий ва спорт савиясида ўтказилди, UZMAMF Racing Team эса жамоавий ҳисобда учинчи ўринни эгаллади.
Ўзбекистон шарафини Ли Сен Ман ва Дилшод Юсупов ҳимоя қилди. Ҳар икки пилот учун кураш жуфтлик босқичига чиқишни белгилаб берувчи яккалик квалификация заездларидан бошланди.
КВАЛИФИКАЦИЯДАН — ЖУФТЛИК БАҲСЛАРИГА
Ли Сен Ман квалификацияда еттинчи натижани, Дилшод Юсупов эса ўн бешинчи натижани қайд этди. Ҳар икки спортчи TOP-16 босқичига чиқиб, курашни давом эттирди.
Ли Сен Манга квалификацияда ўнинчи ўринни эгаллаган Қозоғистон вакили Руслан Смагулов рақиб бўлди. Дилшод Юсупов эса квалификацияда иккинчи натижани қайд этган Қозоғистоннинг икки карра чемпиони Александр Бочкарёв билан беллашди.
Жуфтлик заездларида трассага бир вақтнинг ўзида иккита автомобиль чиқади: етакчи пилот ҳаракат траекториясини белгилайди, таъқиб қилувчи эса яқин масофани сақлаган ҳолда уни имкон қадар аниқ такрорлашга ҳаракат қилади. Бундай кураш бошқарувда аниқлик, барқарорлик ва рақиб ҳаракатларига тезкор муносабат билдиришни талаб қилади.
ПИЛОТЛАР ВА ТЕХНИКА УЧУН ЖИДДИЙ СИНОВ
Жамоа баҳосига кўра, трасса конфигурацияси 700–800 от кучига эга автомобиллар учун мўлжалланган эди, бизнинг пилотлар автомобилларининг қуввати эса тахминан 500 от кучини ташкил этди. Қувватдаги фарқ вазифани сезиларли даражада мураккаблаштирди: спортчилар трассадан ўтиш суръати ва аниқлигини сақлаган ҳолда ўз техникаларининг имкониятларидан максимал даражада фойдаланишларига тўғри келди.
Автомобиллардаги такрорий техник носозликлар ҳам қўшимча синов бўлди. Мусобақа давомида механиклар жамоаси носозликларни тезкорлик билан бартараф этиб, автомобилларни сафга қайтарди ва пилотларга курашни давом эттириш имконини берди. Трассадаги натижа ортида нафақат спортчиларнинг маҳорати, балки техник жамоанинг ҳамжиҳатликдаги меҳнати ҳам турди.
Дилшод Юсупов мусобақанинг юқори даражада ўтганини таъкидлаб, трасса конфигурацияси жуда мураккаб бўлганини қайд этди. Унинг сўзларига кўра, ҳатто дунёнинг етакчи дрифт сериялари билан таққослаганда ҳам ушбу босқич энг мураккабларидан бири бўлди.
Техник қийинчиликлар ва автомобиллар қувватидаги фарққа қарамай, UZMAMF Racing Team жамоавий ҳисобда бронза медалини қўлга киритди.
Жамоавий ўринлар:
1. Kyrgyz Republic Racing Team — Қирғизистон
2. Drift Brother’s Team — Қозоғистон
3. UZMAMF Racing Team — Ўзбекистон
Биринчи FIA Central Asia Drifting Cup жамоамиз учун маҳорат, техника ва жамоавий иш борасида жиддий синов бўлди. Пилотлар ва механиклар қийинчиликларни биргаликда енгиб ўтиб, дебют турнирини шоҳсупадаги ўрин билан якунладилар.
