Ўзбекистон Президенти Шавкат Мирзиёев хоккей жамоаси ва енгил атлетикачиларни эришилган ютуқлар билан табриклади
Президент Шавкат Мирзиёев Ўзбекистон хоккейчилари ва енгил атлетика бўйича терма жамоа аъзоларини халқаро мусобақалардаги муваффақиятлари муносабати билан муборакбод этди. Арманистонда бўлиб ўтган жаҳон чемпионатида Ўзбекистон хоккей жамоаси ўз дивизионида ғолибликни қўлга киритиб, келгуси мавсумда учинчи дивизионда иштирок этиш ҳуқуқини қўлга киритди. Бундан аввалроқ, март ойида Таиландда ўтказилган жаҳон чемпионатида 18 ёшгача бўлган хоккейчиларимиз зафарли ўйин намоён этишган эди.
Саудия Арабистонида бўлиб ўтган 18 ёшгача бўлган ёшлар ўртасидаги Осиё чемпионатида енгил атлетика бўйича Ўзбекистон спортчилари 12 та медалга сазовор бўлди. Жумладан, 3 та олтин, 5 та кумуш ва 4 та бронза медалини қўлга киритиб, тарихда илк бор жамоавий ҳисобда иккинчи ўринни эгаллашди.
Расмий хабарда шундай дейилади:
«Бу ютуқлар, энг аввало, йигит-қизларимизнинг тинимсиз меҳнати, юксак маҳорати, мустаҳкам иродаси ва матонати туфайлидир. Бунда спорт соҳасига қаратилаётган эътибор ва тизимли давлат сиёсатининг ҳам алоҳида ўрни борлигини таъкидлаш жоиз. Мамлакатимизда спорт инфратузилмаси сезиларли даражада яхшиланди, янги мактаблар очилмоқда, спортчиларнинг профессионал ривожланиши учун шарт-шароитлар яратилмоқда».