«Ҳумо» молиявий қийинчиликлар туфайли Қозоғистон чемпионатини ўтказиб юбормоқда
Тошкент клуби Кубок ва чемпионатда иштирок этмайди, бир қатор ҳоккейчилар жамоани тарк этди
Расм: Gazeta.uz
Тошкентнинг «Ҳумо» хоккей клуби молиявий муаммолар туфайли Қозоғистон чемпионатининг навбатдаги мавсумида иштирок этмайди. sports24.kz хабарига кўра, жамоа 22–29 август кунлари Қарағанда ва Ўст-Каменогорск шаҳарларида бўлиб ўтадиган Қозоғистон Кубоги рўйхатидан ҳам чиқарилган.
Meta-ratings.kz манбаси маълумотига кўра, ўзбек клуби молиялаштириш масаласида жиддий қийинчиликларга дуч келган. Айрим хоккейчилар жамоани аллақачон тарк этишган.
Шу тариқа, Pro Hokei Ligasy чемпионатида бу йил 10 та жамоа иштирок этади.
Эслатиб ўтамиз, ўтган мавсумда «Ҳумо» плей-оффда ярим финалгача етиб борган ва етти учрашувдан иборат драматик серияда «Торпедо» (Ўст-Каменогорск) жамоасига мағлуб бўлган эди.
Бакрадзе Иман
Редактор