Тўрт карра Стэнли Кубоги ғолиби Клод Лемьё ўз жонига қасд қилди
Стэнли Кубогининг тўрт карра соҳиби, канадалик афсонавий хоккейчи Клод Лемьё ўз жонига қасд қилди, деб хабар бермоқда TMZ нашри. Аввалроқ унинг 60 ёшида вафот этгани ҳақида маълум қилинган эди.
Манбанинг таъкидлашича, Лемьёнинг уйга қайтмаганидан хавотирга тушган вояга етган ўғли уни тунги соат учлар атрофида оилавий мебель дўконидан топган. Хоккейчининг жасади дўконнинг орқа тарафига жойлашган омборхонадан топилган.
Лемьё фаолияти давомида учта турли жамоа билан Стэнли Кубогини қўлга кирита олган тарихдаги 9 нафар ўйинчидан бири ҳисобланади. У ушбу нуфузли совринга «Монреал Канадиенс» (1986), «Нью-Джерси Девилз» (1995, 2000) ва «Колорадо Эвеланш» (1996) клублари сафида эга чиққан. 1995 йилда эса ҳужумчи плей-офф босқичининг энг қимматли ўйинчиси мукофотини қўлга киритган.
Канада терма жамоаси таркибида эса Лемьё 1985 йилги ёшлар ўртасидаги жаҳон чемпионатида ғолиб чиққан, Канада Кубоги (1987) соҳибига айланган ҳамда Жаҳон Кубогининг (1996) кумуш медали совриндори бўлган эди.
