“Tashkent Select” атрофидаги вазиятга ойдинлик киритилди
Тошкентнинг “Ҳумо” хоккей клуби ва Ўзбекистон хоккей федерацияси ахборот хизматининг собиқ ходими Александр Малишев “Tashkent Select” ёшлар жамоаси ҳолати юзасидан фикр билдирди.
Аввалроқ, клуб Қозоғистон ёшлар чемпионатида навбатдаги мавсумда ҳам қатнашиш ниятида экани, бироқ молиявий қийинчиликлар борлиги ҳақида хабарлар тарқалганди.
— Тошкентда мухлислар тушкун кайфиятда. Бироқ “Tashkent Select” жамоасининг Jastar Hokei Ligasy чемпионатида иштирок этиши учун маблағ топилгани ҳақида миш-мишлар бор. Бу маълумот тасдиқланишини жуда истайман, — деди Малишев.
Унинг сўзларига кўра, миллий терма жамоага ўтиши керак бўлган айрим ёш хоккейчилар бошқа клубларга кетишмоқда. Хусусан, ўтган мавсумда “Tashkent Select” таркибида етакчи бўлган ака-ука Эрик ва Богдан Гайниахметовлар НМХДнинг “Протон” клуби билан шартнома имзолашган. Шунингдек, терма жамоада дарвозабонлар билан боғлиқ муаммо бор, Максим Егуповнинг яна бир мавсум қолиши ҳали номаълум.
— Асосий вазифа — бутун авлодни йўқотмаслик, — деб қўшимча қилди Малишев.
Айни пайтда Қозоғистонда янги қонун лойиҳаси кутилмоқда. Унда хорижий клубларнинг миллий чемпионатларда қатнашиши масаласи тартибга солинади. Мазкур қарор қабул қилингач, “Tashkent Select”нинг чемпионатдаги иштироки бўйича аниқлик киритилади.
