Россиялик хоккейчи Александр Алексеев перцли баллонча қўлланилган ҳолда полиция томонидан қўлга олинди
«Вашингтон Кэпиталз» жамоаси ҳимоячиси, россиялик хоккейчи Александр Алексеев АҚШда полиция томонидан қўлга олинди. Бу воқеа 17 май, шанба куни, барлар ёпилгандан кейин Арлингтон туманида содир бўлди.
25 ёшли спортчи алкоголь таъсирида бўлиб, барлар жойлашган ҳудудда юз берган жанжалда иштирок этган. Патруль полицияси муштлашувни кўриб, воқеа жойига яқинлашган. Ҳозирги маълумотларга кўра, айнан шу пайтда Алексеев бошқа бир эркакка зарба берган ва шундан сўнг полиция ходимларидан бири уни тўхтатиш учун перцли баллонча ишлатган.
Александр Алексеев Арлингтон округи қамоғига олиб кетилган, кейинчалик озод қилинган. Суд мажлиси санаси ҳозирча маълум қилинмаган.
Эслатиб ўтамиз, Алексеев 2018 йилдаги НХЛ драфтида 1-раунд, 31-рақам билан «Вашингтон Кэпиталз» клуби томонидан танлаб олинган.
