Қозоғистон хоккейида фожиа: «Торпедо» ҳужумчиси жамоадошининг ўлимида гумонланмоқда
Telegram’даги Sportilinet нашри хабарига кўра, Ўст-Каменогорск шаҳрининг «Торпедо» ёшлар жамоаси дарвозабони, 19 ёшли Иван Пиленконинг вафоти бўйича терговда янги тафсилотлар пайдо бўлди — ҳодисага клуб легионери Андрей Лагунов алоқадор бўлиши мумкин. Эслатиб ўтамиз, фожиа 2024 йил 2 август куни содир бўлган. Клуб маълумотига кўра, Пиленкого Муз саройида аҳволи ёмонлашган. Дастлабки тиббий ёрдам кўрсатилган, шифокорлар чақирилган, аммо унинг ҳаётини сақлаб қолишнинг иложи бўлмаган — у касалхонада вафот этган. 2022/23 йилги мавсумда Пиленко асосий таркибда икки ўйин ўтказган эди.
Кейинроқ терговчилар ихтиёрига Пиленко ва Россиялик ҳужумчи Андрей Лагунов ўртасидаги жанжал ёзиб олинган видео тушган. Orda.kz маълумотига кўра, низо ишламайдиган ҳаво совутгич сабабли келиб чиққан. Жанжалдан сўнг Пиленко ҳушидан кетган ва кўп ўтмай вафот этган.
Андрей Лагунов 24 ёшда. У 2017 йилдан буён Қозоғистонда тўп суради, «Торпедо» ёшлар жамоаси, МХЛдаги «Ладя» ва Қарағандадаги «Сариарқа» клубларида ўйнаган. Ўтган мавсумда «Торпедо» сафида 51 ўйинда қатнашиб, 37 (18+19) очко тўплаган ва Қозоғистон чемпионатида кумуш медалга сазовор бўлган.
Ҳимоя ва жабрланувчи томон юристларининг маълумотларига кўра, тергов якунланган. Марҳум хоккейчининг қариндошлари тергов Лагунов томонни қўллаганини айтмоқда. Хоккейчининг ўзи эса суд уни айбли деб топса, жазога тайёр эканини билдирган. Суд мажлиси санаси ҳали маълум қилинмаган.