«Филаделфия» 26 сонияда учта гол уриб, NHL тарихидаги камёб натижани такрорлади
22–23 ноябрьга ўтар кечаси бўлиб ўтган NHL мунтазам мавсум учрашувида «Филаделфия Флайерс» ўз майдонида «Нью-Джерси Девилс»ни қабул қилди.
Ўйин мезбонларнинг 6:3 ҳисобидаги йирик ғалабаси билан якунланди. Аммо энг қизиқ воқеа учрашувнинг ўзида эмас, балки илк даврада қайд этилган нойоб натижада бўлди.
Биринчи даврада «Филаделфия» хоккейчилари атиги 26 сония ичида кетма-кет учта шайба киритишга муваффақ бўлди. Бу кўрсаткич NHL тарихидаги бешинчи энг тезкор натижа ҳисобланади.
Мазкур рекорддан тезроқ фақат қуйидаги жамоалар гол ургани қайд этилган:
«Бостон» — 20 сония (25 февраль 1971 йил)
«Чикаго» — 21 сония (23 март 1952 йил)
«Вашингтон» — 21 сония (23 ноябрь 1990 йил)
«Марунс» — 24 сония (15 март 1932 йил)
Бундан ташқари, «Квебек Нордикс» ҳам 1990 йил 27 январда 26 сонияда учта шайба киритган эди.
