Зидан Мбаппенинг Франция терма жамоасидаги позициясини ўзгартирмоқчи
Франция терма жамоаси бош мураббийи Зинедин Зидан Килиан Мбаппени марказий ҳужумчидан кўра чап қанотда кўпроқ ўйнатишни режалаштирмоқда. Мутахассис футболчининг ҳужум чизиғидаги барча позицияларда ўйнай олишини таъкидлаган бўлса-да, унинг энг қулай роли чап қанот эканини қайд этди. Бу ҳақда L’Équipe хабар бермоқда.
“У учала ҳужумкор позицияда ҳам ўйнай олади. Марказий ҳужумчи унинг энг яхши позициясими — бунга ишончим комил эмас. Мен Мбаппени чап қанотда ҳам жуда яхши кўраман”, — деди Зидан Франция терма жамоасидаги илк таркибини эълон қилганидан сўнг.
Шунингдек, Зидан Мбаппенинг ҳимоядаги иштироки борасидаги баҳсларни жиддий муаммо деб ҳисобламаслигини билдирди. Унинг таъкидлашича, жамоа тўпсиз қолганида барча футболчилар сингари Мбаппе ҳам прессинг ва ҳимоявий ҳаракатларда қатнашиши талаб этилади.
Маълумот учун, Мбаппе Франция терма жамоаси сардори бўлиб, миллий жамоа сафида 66 та гол урган. Зидан эса 2026 йил ёзида Дидье Дешам ўрнини эгаллади ва 18 сентябр куни Франция бош мураббийи сифатидаги илк таркибини эълон қилди. Унинг қўл остидаги дастлабки учрашув 25 сентябр куни Туркияга қарши УЕФА Миллатлар лигаси доирасида ўтказилади.
