Жюль Кунде фаолиятини «Реал»да давом эттириши мумкин — манба
«Барселона» ҳимоячиси Жюль Кунде ёзги трансфер ойнасида клубини ўзгартириши мумкин. Topskills Sports UK нашрининг хабар беришича, футболчига Мадриднинг «Реал» клуби жиддий қизиқиш билдираётгани маълум.
«Барселона» раҳбарияти Кунденинг жамоанинг дахлсиз ўйинчиларидан бири деб ҳисоблайди, бироқ клубга 60-80 миллион евро атрофида таклиф тушса, «кўк-анорранглилар» трансфер вариантини кўриб чиқишга тайёр.
Шунингдек, ҳимоячи учун «Челси» ҳам курашга қўшилиши мумкин. Кунденинг «Барселона» билан амалдаги шартномаси 2030 йилгача мўлжалланган.
Жорий мавсумда 27 ёшли Кунде клуб миқёсида барча турнирларда 36 та ўйинда майдонга тушиб, 3 та гол ва 2 та голли узатмани ўз ҳисобига ёздириб қўйди. Transfermarkt портали маълумотларига кўра, футболчининг бозор қиймати 65 миллион еврони ташкил этади.
