Жюль Кунде фаолиятини АПЛда давом эттириши мумкин
«Барселона»нинг ўнг қанот ҳимоячиси Жюль Кунде фаолиятини бошқа клубда давом эттириши мумкин. Бу ҳақда Mundo Deportivo нашри хабар бермоқда.
27 ёшли француз футболчисига «Ливерпул», «Манчестер Сити» ва «Челси» каби клублар жиддий қизиқиш билдирмоқда. Хусусан, мерсисайдликлар мудофаа чизиғини янада ишончли ҳимоячи билан кучайтиришни режалаштирган. Сабаби, жамоанинг бошқа бир аъзоси Жереми Фримпонг кўпроқ ҳужумкор ҳаракатларга мойиллик кўрсатмоқда.
Манбанинг таъкидлашича, «қизиллар» Кунде учун тахминан 80 миллион евро таклиф қилишга тайёр.
Каталония клуби раҳбарияти Кунде ни юқори баҳолайди ва уни жамоада олиб қолишни истайди. Бироқ, агар молиявий жиҳатдан жуда манфаатли таклиф тушса, клубнинг иқтисодий ҳолати сабабли уни рад этиш қийин бўлишини тушуниб турибди.
Агар ушбу трансфер амалга ошса, «Барселона» тушган маблағни таркибни кучайтиришга йўналтирмоқчи: клубнинг қисқа рўйхатидан (short-list) «Атлетико» ҳужумчиси Хулиан Алварес ва «Интер» ҳимоячиси Алессандро Бастони ўрин олган. Кунденинг ўрнига эса Жоау Канселу билан шартномани узайтириш ёки «Ювентус» ҳимоячиси Андреа Камбьязони сотиб олиш вариантлари кўриб чиқилмоқда.
Маълумот учун, Жюль Кунде 2022 йилнинг июль ойида «Севилья»дан «Барселона»га ўтган эди. Жорий мавсумда у барча турнирларда 40 та ўйинда майдонга тушиб, 3 та гол урди ва 4 та голли узатмани амалга оширди.
