Жозе Моуринью икки ўйинга дисквалификация қилинди
«Бенфика» бош мураббийи Жозе Моуринью «Порту»га қарши кечган (2:2) баҳсда рақиб томонга қаратилган ноўрин хатти-ҳаракатлари ва юзага келган можаро сабабли икки ўйинга четлаштирилди. Бу ҳақда ESPN ахборот агентлиги хабар бермоқда.
Португалия Футбол Федерациясининг интизомий қўмитаси 63 ёшли мутахассисга нисбатан икки томонлама жаза чорасини қўллади. Мураббий якшанба куни ўтказилган ўйиннинг сўнгги дақиқаларида техник зонадан чиқиб, жамоаси гол урганидан сўнг тўпни «Порту» захира ўриндиғи томон тепкани учун бир ўйинга дисквалификация қилинди. Моуринью эса ўз навбатида тўпни трибунага йўлламоқчи бўлганини таъкидлади.
Шунингдек, «Порту» мураббийи ёрдамчиси Лучо Гонсалес билан юзага келган ўзаро келишмовчилик туфайли мутахассис 11 кунлик муддатга четлатилди.
«Бенфика» клуби 12 март куни қабул қилинган ушбу қарорларга нисбатан норозилик билдириб, апелляция шикояти киритишини маълум қилди. Клуб раҳбарияти Моуриньюга нисбатан қўлланилган жаза чораларини асоссиз ва адолатсиз деб баҳоламоқда.
