Жозе Моуриньо бугун Мадридга етиб келади, эртага эса унинг тақдимоти ўтказилади
Португалиялик мутахассис Жозе Моуриньо бугун, 9 июн куни Мадридга етиб келади. Унинг «Реал Мадрид» бош мураббийи сифатидаги расмий тақдимоти эса эртага, 10 июн куни бўлиб ўтиши кутилмоқда. Бу ҳақда журналист Рамон Альварес де Мон ўзининг ижтимоий тармоқдаги саҳифасида маълум қилди.
Аввалроқ, клуб президентилик сайловида ғалаба қозонган Флорентино Перес португалиялик мутахассис «қироллик клуби» бош мураббийи этиб тайинланишини расман эълон қилган эди.
Эслатиб ўтамиз, Моуриньо муқаддам 2010 йилдан 2013 йилгача бўлган даврда ҳам «Реал»да фаолият юритган. Унинг қўл остида жамоа Испания чемпионлиги, мамлакат Кубоги ва Суперкубогини қўлга киритган эди.
Якунланган мавсум якунларига кўра, «қаймоқранглилар» бирорта ҳам совринга эга чиқа олишмади. Мавсумнинг биринчи қисмида жамоани Хаби Алонсо бошқарган бўлса, унинг январ ойидаги истеъфосидан сўнг бошқарувни Алваро Арбелоа ўз қўлига олган ва у ҳам мавсум якунлангач, лавозимини тарк этган эди.
