Жордан Пикфорд эҳтиётсиз автомобиль бошқарганини тан олди
«Эвертон» ва Англия терма жамоаси дарвозабони Жордан Пикфорд йўл ҳаракати қоидаларини бузиб, эҳтиётсиз автомобиль бошқарганлик айбини тан олди. Ҳодиса 14 апрель куни Чешир графлигининг Нотсфорд шаҳрида юз берган: Пикфорд «Lamborghini Urus» автомобилида «йўл беринг» белгисига амал қилмаган ва икки машина кескин тормоз беришга мажбур бўлган. Бу ҳақда Mirror нашри хабар бермоқда.
Манбага кўра, воқеадан кейин Пикфорд катта тезликда ҳаракатни давом эттирган, полиция эса уни таъқиб қилиб, тўхтатган. Футболчи айбини ёзма равишда тан олган ва суд мажлисида шахсан қатнашиб, вазият бўйича ўз изоҳларини тақдим этишни сўраган.
Иш дастлаб соддалаштирилган тартибда кўриб чиқилган, бироқ Пикфорд судда қатнашиш истагини билдиргани сабаб якуний мажлис 7 декабрга кўчирилди. Суд Честер магистратлар судида бўлиб ўтади. Футболчига автомобилни етарлича эҳтиёткорлик ва эътиборсиз бошқарганлик бўйича айблов қўйилган.
Маълумот учун, 32 ёшли Жордан Пикфорд «Эвертон» сафида ҳозиргача 336 та учрашув ўтказган, Англия терма жамоаси ҳисобида эса 92 та ўйин мавжуд. У терма жамоа билан 2018, 2022 ва 2026 йилги Жаҳон чемпионатларида қатнашган, шунингдек, Евро-2020 ва Евро-2024 финалларида Англия дарвозасини қўриқлаган.
