«Жохор Дарул Тазим» миллий чемпионатда мағлубиятсиз ўйинлар бўйича жаҳон рекордини ўрнатди
Малайзиянинг «Жохор Дарул Тазим» клуби миллий чемпионатда кетма-кет мағлубиятсиз ўтказилган учрашувлар сони бўйича жаҳон рекордини ўрнатди. Бу ҳақда Reuters хабар берди.
Янги мавсумнинг 1-турида «Жохор» «Кучинг»ни 3:0 ҳисобида мағлуб этди. Шу тариқа клубнинг Малайзия чемпионатидаги мағлубиятсиз серияси 109 та ўйинга етди.
Малайзияликлар ушбу натижа билан Кот-д’Ивуарнинг «АСЕК Мимозас» клубига тегишли рекордни янгилади. «АСЕК Мимозас» 1989 йилдан 1994 йилгача миллий чемпионатда 108 та учрашув давомида мағлуб бўлмаган эди.
«Жохор Дарул Тазим» ўтган мавсумнинг сўнгги учрашувида мазкур натижани такрорлаганди. Янги мавсумдаги ғалаба эса клубга рекордни янгилаш имконини берди.
«Жохор» сўнгги тўрт мавсумда Малайзия чемпиони бўлган. Клуб миллий чемпионатда энг сўнгги мағлубиятини 2021 йил апрель ойида қабул қилган. Шундан бери жамоа мамлакат чемпионатида бирор марта ҳам мағлуб бўлмаган.
