Жоан Лапорта: «Мессига ҳайкал қўямиз, Хави эса ўз ишига масъулиятсизлик қилди»
«Барселона» президенти Жоан Лапорта Mundo Deportivo нашрига берган интервьюсида клубнинг келажакдаги режаларини маълум қилиб, собиқ бош мураббий Хави Эрнандеснинг фаолиятига нисбатан кескин танқидий фикрларини билдирди.
Лапорта клуб афсонаси Лионель Мессини муносиб тарзда тақдирлаш ниятида эканлигини тасдиқлади. Унинг сўзларига кўра, стадион реконструкцияси якунлангач, аргентиналик юлдуз шарафига ҳайкал қўйилади ва унга бағишланган хайрлашув учрашуви ташкил этилади.
«Биз Мессига ҳайкал қўймоқчимиз ва стадионимиз қуриб битказилгандан сўнг, унинг шарафига хайрлашув ўйинини ўтказишни режалаштиряпмиз», — деди клуб раҳбари.
Интервью давомида Жоан Лапорта Хавининг истеъфосига тўхталар экан, мураббийнинг профессионал ва шахсий ҳаётидаги муаммолар жамоа натижаларига салбий таъсир кўрсатганини таъкидлади.
«Хави интервьюларида мени уни ишдан бўшатганим учун айблаб, ўзини оқламоқчи. Аслида эса у ўзига ортиқча бино қўйиб, профессионал вазифаларини шахсий ҳаёти билан уйғунлаштира олмади. У «Барса» «Реал» билан рақобатлаша олмайди, деб таъкидлаб, таркибни ўзгартиришни талаб қилди. Мен эса унга бундай ёндашув билан ишни давом эттира олмаслигимизни айтдим», — дея қўшимча қилди Лапорта.
Эслатиб ўтамиз, Хави аввалроқ клуб раҳбариятини таркибни кучайтиришда иккиланганликда айблаб, ўзининг истеъфога чиқарилиш жараёни тафсилотларини фош қилган эди. Бу вазият клуб атрофидаги зиддиятлар ҳали ҳам давом этаётганини кўрсатади.
