Жермейн Дефо \"Уокинг\" бош мураббийлигидан кетди
Англия терма жамоасининг собиқ ҳужумчиси ва Лондоннинг "Тоттенҳэм" клуби афсоналаридан бири Жермейн Дефо "Уокинг" бош мураббийлиги лавозимини тарк этди.
Томонлар ўзаро келишув асосида ҳамкорликни якунлаганини расман эълон қилди. Шу тариқа, Дефо клубдаги илк бош мураббийлик фаолиятини атиги 116 кундан сўнг якунлади.
43 ёшли мутахассис 2026 йил март ойида "Уокинг" бош мураббийи этиб тайинланганди. Унинг қўл остида жамоа олти та расмий учрашув ўтказиб, икки ғалаба, уч дуранг ва бир мағлубият қайд этди ҳамда мавсумни Англия Миллий лигасида 10-ўринда якунлади.
Жермейн Дефо ўз баёнотида бундай қарорга келишига клубдаги вазият сабаб бўлганини билдириб, фаолиятини давом эттириш "имконсиз" бўлиб қолганини таъкидлади. "Уокинг" раҳбарияти эса мутахассисга қилган меҳнати учун миннатдорлик билдириб, унинг кейинги фаолиятига омад тилади.
