Жереми Жаке: «Ливерпул» билан шартнома имзолаш мен учун катта шараф»
«Ренн» ҳимоячиси Жереми Жаке Англиянинг «Ливерпул» клубига ўтганини тасдиқлади. Мерсисайдликлар 20 ёшли иқтидорли футболчи учун курашда «Челси»ни ортда қолдириб, 60 миллион евро тўлашга рози бўлишди. Келишувга кўра, марказий ҳимоячи жорий мавсум якунига қадар Франция чемпионатида тўп суришда давом этади.
«Дунёдаги энг буюк клублардан бири — «Ливерпул» билан шартнома имзолаш мен учун катта шараф. Шу билан бирга, ўзим ўсиб-улғайган ва мен учун қадрли бўлган «Ренн»даги саргузаштларимни юқори нотада якунлаш жуда муҳим эди.
Мавсумнинг иккинчи қисмида жамоадошларим ва мухлисларимиз билан бирга ажойиб ҳис-туйғуларни бошдан кечириш истагидаман», — дея Жакенининг сўзларини келтирмоқда Goal нашри.
Эслатиб ўтамиз, Жереми Жаке Франция U21 ёшлар терма жамоаси сафида 5 та ўйинда иштирок этган. У жорий мавсумда «Ренн» таркибида мамлакат олий дивизионида 18 та учрашувда майдонга тушди.
Маълумот учун, марказий ҳимоячи 2024 йил январ ойидаги дебютидан буён «Ренн»нинг асосий таркибида жами 31 та ўйинда иштирок этишга улгурди.
