Жейдон Санчо фаолиятини Мадрид клубида давом эттириши мумкин
Испаниянинг “Хетафе” клуби “Манчестер Юнайтед”нинг собиқ вингери Жейдон Санчони трансфер қилиш имкониятини кўриб чиқмоқда. Мадридликлар ҳозирда эркин агент мақомида бўлган 26 ёшли англиялик футболчи орқали ҳужум чизиғини кучайтиришни режалаштирмоқда. Бу ҳақда Mundo Deportivo нашри DAZN журналисти Пабло Пинтога таяниб хабар бермоқда.
Манбага кўра, “Хетафе” бош мураббийи Хосе Бордалас Санчонинг ўйин услубини юқори баҳоламоқда. Айниқса, футболчининг қанотларда ҳаракат қилиши, рақибларни алдаб ўтиши ва яккама-якка вазиятларда устунликка эриша олиши мутахассисга маъқул келган. Шу сабабли клуб раҳбарияти инглиз футболчисини жамоага олиб келиш йўлларини ўрганмоқда.
Бироқ трансфернинг амалга ошишига Санчонинг молиявий талаблари тўсқинлик қилиши мумкин. Футболчи йилига 4–5 миллион евро маош олишни истамоқда. Бу эса “Хетафе”нинг ҳозирги молиявий имкониятларидан юқори. Клуб маошлар учун ажратилган маблағни ошириш йўлларини изламоқда, аммо ҳозирча томонлар ўртасида келишувга эришилмаган.
Маълумот учун, Жейдон Санчо 2021 йилда Дортмунднинг “Боруссия” клубидан “Манчестер Юнайтед”га трансфер қилинган. Ўтган мавсумни “Астон Вилла” сафида ижарада ўтказган футболчи барча мусобақаларда 39 та учрашувда майдонга тушган. Санчо 2026 йил ёзида Манчестер клубини тарк этган ва июль ойидан буён эркин агент ҳисобланади.
