Жейдон Санчо АПЛнинг икки клуби билан музокара олиб бормоқда
“Манчестер Юнайтед”нинг собиқ вингери Жейдон Санчо фаолиятини Англия Премьер-лигасида давом эттириши мумкин. 26 ёшли футболчи айни пайтда АПЛнинг икки клуби билан музокара олиб бормоқда. Бу ҳақда TEAMtalk’га таяниб, Euro-Football хабар берди.
Манбага кўра, Санчога унинг собиқ клуби Дортмунднинг “Боруссия”си ҳам қизиқиш билдирмоқда. Бундан ташқари, Туркия, Саудия Арабистони ва БАА клублари ҳам англиялик футболчининг ҳолатини кузатиб бормоқда. Ҳозирча музокара олиб бораётган икки Премьер-лига клуби номи ошкор қилинмаган.
Санчо ёзги трансфер ойнасида “Манчестер Юнайтед”ни эркин агент сифатида тарк этди ва ҳозирча янги жамоа билан шартнома имзоламади. Шу сабаб футболчи трансфер ойнаси ёпилганидан кейин ҳам исталган клуб билан эркин агент сифатида келишувга эришиши мумкин.
Маълумот учун, Transfermarkt маълумотига кўра, Жейдон Санчонинг бозор қиймати 18 миллион еврога баҳоланмоқда. У “Манчестер Юнайтед”га 2021 йилда Дортмунднинг “Боруссия”сидан ўтган, кейинчалик эса “Боруссия”, “Челси” ва “Астон Вилла”да ижара асосида тўп сурган.
