ЖЧ-2030 финали «Сантьяго Бернабеу»да ўтказилиши мумкин
2030 йилги футбол бўйича Жаҳон чемпионати финал учрашуви Мадриднинг «Реал» клубига тегишли «Сантьяго Бернабеу» стадионида бўлиб ўтиши мумкин. Бу ҳақда AS нашри хабар бермоқда.
Манбага кўра, финални айнан Мадридда ўтказиш қарори «Реал» президенти Флорентино Перес ва FIFA президенти Жанни Инфантино ўртасидаги мустаҳкам алоқалар билан боғлиқ бўлиши мумкин. Қайд этилишича, мезбон шаҳарлар бўйича якуний рўйхат 2026 йилнинг охирги ойларида эълон қилинади. FIFA эса Испания, Марокаш ва Португалия қабул қиладиган мундиалнинг якуний форматини ёз охиригача тасдиқламайди.
Шунингдек, FIFA Испаниянинг дастлабки устунлигини, тақдим этиладиган стадионлар сонини ҳамда мамлакатнинг жаҳон футболидаги ўрнини ҳисобга олмоқда. «Сантьяго Бернабеу» фойдасига стадион брендининг жозибадорлиги, кенг кўламли модернизация ишлари ва йирик спорт тадбирларини қабул қилиш бўйича исботланган тажриба ҳам муҳим омил бўлиб хизмат қилмоқда.
Номзодлар орасида, шунингдек, Мадриднинг «Атлетико» клубига қарашли «Метрополитано» стадиони ҳам бор. «Камп Ноу» ҳам рўйхатда тилга олинмоқда, бироқ «Барселона» стадионининг реконструкцияси атрофидаги ноаниқликлар ҳали ҳам сақланиб қолмоқда. «Бенфика» стадиони эса жиддий номзод сифатида кўрилмаяпти.
