ЖЧ-2026 очилиш ўйинидан аввал стадион яқинида ҳушини йўқотган мухлис вафот этди
Мексика ва ЖАР терма жамоалари ўртасидаги Жаҳон чемпионатининг очилиш учрашуви бошланишидан бир неча дақиқа олдин «Ацтека» стадиони яқинида ҳушини йўқотган мухлис ҳаётдан кўз юмди. Бу ҳақда журналист Патриция Эстрада маълум қилди.
Аввалроқ шифокорлар ушбу эркакка юрак-ўпка реанимациясини амалга ошираётгани акс этган видео тасвирлар тарқалган эди. Берилган маълумотларга кўра, 40 ёшлар ҳисобланган мухлис стадионга киргандан сўнг юрак хуружини (инфаркт) бошдан кечирган.
Эслатиб ўтамиз, турнирнинг асосий босқичида 48 та терма жамоа иштирок этаётган бўлиб, улар 4 тадан 12 та гуруҳга бўлинган. Мусобақага мезбонлик қилаётган уч мамлакат (АҚШ, Канада, Мексика) турнирда тўғридан-тўғри қатнашиш ҳуқуқини қўлга киритган, қолган жамоалар эса саралаш босқичидан ўтиб келишган.
Гуруҳ босқичи ўйинлари 11-июндан 27-июнга қадар давом этади. Унда жамоалар бир даврали тизимда ўзаро баҳс олиб боришади (ҳар бир терма жамоа учтадан ўйин ўтказади). Плей-офф босқичига ҳар бир гуруҳдан иккитадан энг яхши жамоа ҳамда учинчи ўринни эгаллаган энг кучли 8 та терма жамоа йўл олади. Мусобақа давомида жами 104 та учрашув ўтказилади ва бу Жаҳон чемпионатлари тарихидаги мутлақ рекорд кўрсаткичдир.