ЖЧ-2026. Нидерландия Тунисны мағлубиятга учратиб, гуруҳда 1-ўринни эгаллади
Жаҳон чемпионати гуруҳ босқичининг 3-тури доирасида Тунис ҳамда Нидерландия терма жамоалари ўртасидаги учрашув бўлиб ўтди. Бахсда нидерландияликлар 3:1 ҳисобида ғалабани қўлга киритди.
Учрашув тақдири асосан биринчи бўлимдаёқ ойдинлашди. Ўйиннинг 3-дақиқасидаёқ Тунис терма жамоаси аъзоси Элиес Схири ўз дарвозасига тўп киритиб қўйиб, жамоасини қийин аҳволга солди. 7-дақиқада Виржил ван Дейкнинг узатмасидан сўнг Браян Броббей рақиб дарвозасини аниқ нишонга олди.
Иккинчи бўлимда Тунис терма жамоаси вазиятни ўнглашга қаттиқ киришди. Бунинг натижасида учрашувнинг 54-дақиқасида Ҳазем Мастури рақиб дарвозасини ишғол қилиб, ҳисобдаги фарқни қисқартиришга муваффақ бўлди. Аммо 62-дақиқада Ян Пол ван Хекке европаликларнинг учинчи голини киритди.
Маълумот учун, ушбу ғалабадан сўнг Нидерландия «F» гуруҳида пешқадамга айланиб, Жаҳон чемпионатининг плей-офф босқичига йўл олди.
