ЖЧ-2026. Чехия ва ЖАР ўйинида ғолиб аниқланмади
Футбол бўйича 2026 йилги Жаҳон чемпионати «A» гуруҳи 2-тури доирасидаги Чехия ва ЖАР терма жамоалари ўртасидаги учрашув якунланди. АҚШнинг Атланта шаҳридаги «Мерседес-Бенс Стадиум» ўйингоҳида кечган баҳсни америкалик ҳакам Тори Пенсо бошқариб борди. Учрашувда жамоалар 1:1 ҳисобида дурангга имзо чекишди.
Учрашувнинг 6-дақиқасидаёқ ярим ҳимоячи Михал Садилек чехларни ҳисобда олдинга олиб чиқди. Ўйин якуни арафасида, яъни 83-дақиқада ҳакам Тори Пенсо чехлар дарвозасига қўл билан ўйнаганлик учун пеналти тайинлади. Ярим ҳимоячи Тебохо Мокоена ўн метрлик жарима зарбасини аниқ амалга ошириб, ҳисобни тенглаштирди.
Эслатиб ўтамиз, гуруҳ босқичининг 1-турида Чехия терма жамоаси Жанубий Кореяга (1:2) имкониятни бой берган эди. ЖАР эса турнирнинг очилиш ўйинида Мексика термасидан (0:2) мағлубиятга учраган эди. Гуруҳнинг сўнгги турида чехлар Мексикага қарши, ЖАР вакиллари эса Жанубий Кореяга қарши майдонга тушадилар.
