JCh-2026. Chexiya va JAR o‘yinida g‘olib aniqlanmadi
Futbol bo‘yicha 2026-yilgi Jahon chempionati «A» guruhi 2-turi doirasidagi Chexiya va JAR terma jamoalari o‘rtasidagi uchrashuv yakuniga yetdi. AQShning Atlanta shahridagi «Mersedes-Bens Stedium» o‘yingohida kechgan bahsni amerikalik hakam Tori Penso boshqarib bordi. Unda jamoalar 1:1 hisobidagi durangga imzo chekishdi.
Uchrashuvning 6-daqiqasidayoq yarim himoyachi Mixal Sadilek chexlarni hisobda oldinga olib chiqdi. O‘yin yakunlanishi arafasida, ya’ni 83-daqiqada hakam Tori Penso chexiyaliklar darvozasiga qo‘l bilan o‘ynalgani uchun penalti belgiladi. Yarim himoyachi Teboho Mokoena o‘n metrlik jarima zarbasini aniq amalga oshirib, muvozanatni tikladi.
Eslatib o‘tamiz, guruh bosqichining 1-turida Chexiya terma jamoasi Janubiy Koreyaga (1:2) imkoniyatni boy bergan edi. JAR esa turnirning ochilish o‘yinida Meksika termasidan (0:2) mag‘lubiyatga uchragan edi. Guruhning so‘nggi turida chexlar Meksikaga qarshi, JAR vakillari esa Janubiy Koreyaga qarshi maydonga tushadilar.
