ЖЧ-2026. Босния ва Герцеговина Италияни мағлуб этиб, Жаҳон чемпионати йўлланмасини қўлга киритди
Зеница шаҳридаги «Билино Поле» стадионида 2026 йилги Жаҳон чемпионатига йўлланма берувчи «A» йўли ўтиш баҳсларининг финал учрашуви бўлиб ўтди. Унда Босния ва Герцеговина ҳамда Италия терма жамоалари ўзаро куч синашишди.
Ўйиннинг 15-дақиқасида Мойзе Кин ҳисобни очиб, меҳмонларни олдинга олиб чиқди. Бироқ учрашувнинг 42-дақиқасида Италия терма жамоаси ҳимоячиси Алессандро Бастони қизил карточка олиб, майдонни тарк этди. Сон жиҳатдан устунликка эга бўлган мезбонлар 79-дақиқада мувозанатни тиклашга муваффақ бўлишди — гол муаллифи Харис Табакович.
Учрашувнинг асосий ва қўшимча вақтлари 1:1 ҳисобидаги дуранг билан якунлангач, ғолиб номи пенальтилар сериясида аниқланди. Унда Босния ва Герцеговина футболчилари 4:1 ҳисобига ғалаба қозониб, Жаҳон чемпионати йўлланмасига эга бўлишди.
Маълумот ўрнида, Босния ва Герцеговина яримфинал босқичида Уэльс тўсиғидан ўтган эди (1:1, пен. бўйича — 4:2). Италия эса Шимолий Ирландия устидан 2:0 ҳисобида ғалаба қозониб, финалга йўл олганди.
Эслатиб ўтамиз, амалдаги жаҳон чемпиони Аргентина терма жамоаси ҳисобланади. 2022 йилги жаҳон биринчилиги финалида аргентиналиклар Франция билан дуранг ўйнаб (3:3), пенальтилар сериясида (4:2) ғалаба қозонишган эди.
