ЖЧ-2026: Бельгия ва Эрон терма жамоалари ўртасидаги ўйин нурсиз дуранг билан якунланди
Футбол бўйича 2026-йилги Жаҳон чемпионати «G» гуруҳи 2-тури доирасидаги Бельгия ва Эрон терма жамоалари ўртасидаги ўйин якунланди. Якуний ҳуштак чалингандан сўнг 0:0 ҳисоби қайд этилди. Учрашув Инглвуддаги (АҚШ) «Софи» («SoFi Stadium») стадионида бўлиб ўтди. Баҳсда аргентиналик Дарио Эррера (Андаколо) бош ҳакам сифатида фаолият олиб борди.
Ўйиннинг 25-дақиқасида Мехди Тареми ҳисобни очиб, Эрон терма жамоасини олдинга олиб чиққан эди, бироқ VAR ёрдамида киритилган гол бекор қилинди. 67-дақиқада эса бельгияликлар ҳимоячиси Натан Нгой майдондан четлатилди.
Ушбу ўйиндан кейин Бельгия ва Эрон ҳисобида иккитадан очко мавжуд. Янги Зеландия ва Мисрда эса биттадан очко бор — бу жамоалар ўзаро учрашувини 22-июн куни ўтказишади (ўйин Тошкент вақти билан тонгги соат 06:00 да бошланади).
3-турда Бельгия терма жамоаси Янги Зеландия миллий жамоаси билан тўқнаш келади (27-июн), Эрон эса Мисрга қарши майдонга тушади (шунингдек, 27-июн).
Эслатиб ўтамиз, Жаҳон чемпионати — 2026 мусобақалари 11-июндан 19-июлгача АҚШ, Канада ва Мексика майдонларида бўлиб ўтмоқда. Амалдаги жаҳон чемпиони Аргентина терма жамоаси ҳисобланади.
