JCh-2026:Belgiya va Eron terma jamoalari oʻrtasidagi oʻyin nursiz durang bilan yakunlandi
Futbol boʻyicha 2026-yilgi Jahon chempionati «G» guruhi 2-turi doirasidagi Belgiya va Eron terma jamoalari oʻrtasidagi oʻyin yakunlandi. Yakuniy hushtak chalingandan soʻng 0:0 hisobi qayd etildi. Uchrashuv Inglvuddagi (AQSH) «Sofi» («SoFi Stadium») stadionida boʻlib oʻtdi. Bahsda argentinalik Dario Errera (Andakolo) bosh hakam sifatida faoliyat olib bordi.
Oʻyinning 25-daqiqasida Mehdi Taremi hisobni ochib, Eron terma jamoasini oldinga olib chiqqan edi, biroq VAR yordamidan soʻng kiritilgan gol bekor qilindi. 67-daqiqada esa belgiyaliklar himoyachisi Natan Ngoy maydondan chetlatildi.
Ushbu oʻyindan keyin Belgiya va Eron hisobida ikkitadan ochko mavjud. Yangi Zelandiya va Misrda esa bittadan ochko bor — bu jamoalar oʻzaro uchrashuvini 22-iyun kuni oʻtkazishadi (oʻyin Toshkent vaqti bilan tonggi soat 06:00 da boshlanadi).
3-turda Belgiya terma jamoasi Yangi Zelandiya milliy jamoasi bilan toʻqnash keladi (27-iyun), Eron esa Misrga qarshi maydonga tushadi (shuningdek, 27-iyun).
Eslatib oʻtamiz, Jahon chempionati — 2026 musobaqalari 11-iyundan 19-iyulgacha AQSH, Kanada va Meksika maydonlarida boʻlib oʻtmoqda. Amaldagi jahon chempioni Argentina terma jamoasi hisoblanadi.
