ЖЧ-2026. Аргентина Швейцарияни мағлуб этиб, ярим финалга чиқди
15 июль куни Англия терма жамоасига қарши майдонга тушади.
ФОТО: Getty images
2026 йилги Жаҳон чемпионатининг чорак финал баҳсида Аргентина миллий терма жамоаси қўшимча вақтда Швейцарияни 3:1 ҳисобида мағлуб этиб, ярим финалга йўл олди.
АҚШнинг Миссури штати, Канзас-Сити шаҳрида бўлиб ўтган учрашувда ҳисобни 10-дақиқада Алексис Мак Аллистер очди. Швейцария сафида Дан Ндойе 67-дақиқада мувозанатни тиклади.
Учрашувнинг асосий вақти ғолибни аниқлаб бермаганидан сўнг, қўшимча бўлимларга ўтилди. 112-дақиқада Хулиан Алварес голи жамоасини яна олдинга олиб чиққан бўлса, 120+1-дақиқада Лаутаро Мартинес учрашувга нуқта қўйди.
Шу тариқа, Аргентина ярим финалга чиқди ва жорий йилнинг 15 июль куни Англия терма жамоасига қарши майдонга тушади.