ЖАР терма жамоаси футболчиси Жейден Адамс 25 ёшида вафот этди
ЖАР терма жамоаси ва «Мамелоди Сандаунс» клуби марказий ярим ҳимоячиси Жейден Адамс 25 ёшида вафот этди. Футболчининг ўлим сабаби ҳозирча маълум қилинмаган.
Адамснинг мураббийи Брендин Жонсон унинг оиласи номидан баёнот бериб, яқинлари чуқур қайғуда эканини маълум қилди.
«Ҳали ҳам бу воқеага ишониш қийин, дард жуда янги. Оила ҳозир ҳеч ким билан гаплашишга тайёр эмас, шунинг учун уларнинг тинчлигини ҳурмат қилишингизни сўраймиз. Бу ўлим барчани ларзага солди. У эндигина жаҳон чемпионатидан қайтган эди.
Пайшанба куни у билан суҳбатлашгандим. У жуда яхши кайфиятда эди, турнирдан кейин уйига қайтганидан хурсандлигини айтганди. КАФ Чемпионлар лигаси ғолиби сифатида олдинга интилишга тайёр эди. У бор вақтини оиласи билан ўтказишга ҳаракат қиларди.
Менда буни ифода этиш учун сўз йўқ. Ҳа, афсуски, унинг вафот этганини тасдиқлайман. Бундай воқеани ҳеч ким кутмаган эди», — деди Жонсон Soccer Laduma порталига.
Жейден Адамс 2026 йилги жаҳон чемпионатида Жанубий Африка Республикаси терма жамоаси сафида учта учрашувда майдонга тушди.
У ўтган мавсумда «Мамелоди Сандаунс» билан Африка Чемпионлар лигаси ғолиблигини қўлга киритган эди.
