Жаҳон чемпионати қаҳрамони Возинья Чилига йўл олиши мумкин
2026 йилги жаҳон чемпионатидаги ёрқин ўйини билан эътибор қозонган Кабо-Верде терма жамоаси дарвозабони Возинья фаолиятини Чили чемпионатида давом эттириши мумкин. Бу ҳақда журналист Сесар Луис Мерло хабар берди.
Манбага кўра, Чилининг машҳур «Коло-Коло» клуби президенти Анибаль Моса ташаббуси билан 40 ёшли голкипер билан музокараларни бошлаган.
Қизиғи шундаки, жамоа бош мураббийи Фернандо Ортис Возиньяни шахсан талаб қилмаган. Бироқ у музокаралар давом этиши ва тажрибали дарвозабоннинг жамоага қўшилишига қарши эмас.
Возинья 2026 йилги жаҳон чемпионатида 4 та учрашувда майдонга тушиб, уларнинг иккитасида ўз дарвозасини дахлсиз сақлаб қолди. Унинг ишончли ҳаракатлари Кабо-Верде терма жамоасининг мундиалдаги муваффақиятли иштирокида муҳим омиллардан бири бўлди.
Тажрибали голкипернинг Португалиянинг иккинчи дивизионида иштирок этувчи «Шавиш» клуби билан тузган шартномаси жорий ёзда якунланди ва ҳозирда у эркин агент мақомига эга.
