Jahon chempionati qahramoni Vozinya Chiliga yo‘l olishi mumkin
2026 yilgi jahon chempionatidagi yorqin o‘yini bilan e’tibor qozongan Kabo-Verde terma jamoasi darvozaboni Vozinya faoliyatini Chili chempionatida davom ettirishi mumkin. Bu haqda jurnalist Sesar Luis Merlo xabar berdi.
Manbaga ko‘ra, Chilining mashhur «Kolo-Kolo» klubi prezidenti Anibal Mosa tashabbusi bilan 40 yoshli posbon bilan muzokaralar boshlangan.
Qizig‘i shundaki, jamoa bosh murabbiyi Fernando Ortis Vozinyani shaxsan talab qilmagan. Biroq u muzokaralar davom etishi va tajribali darvozabonning jamoaga qo‘shilishiga qarshi emas.
Vozinya 2026 yilgi jahon chempionatida 4 ta uchrashuvda maydonga tushib, ularning ikkitasida o‘z darvozasini dahlsiz saqlab qoldi. Uning ishonchli harakatlari Kabo-Verde terma jamoasining mundialdagi muvaffaqiyatli ishtirokida muhim omillardan biri bo‘ldi.
Tajribali posbonning Portugaliyaning ikkinchi divizionida ishtirok etuvchi «Shavish» klubi bilan tuzgan shartnomasi joriy yozda yakunlandi va hozirda u erkin agent maqomiga ega.
