Жанни Инфантино ЖЧ иштирокчилари сонини 64 тага етказмоқчи
FIFA президенти Жанни Инфантино келажакда Жаҳон чемпионати иштирокчилари сонини янада кенгайтириш имкониятлари ҳақида тўхталиб ўтди ҳамда Италия терма жамоасининг жаҳон биринчилигига чиқа олмагани борасида ҳазил қилди.
Эслатиб ўтамиз, 2026-йилги турнирда 48 та терма жамоа иштирок этмоқда.
«Бутун дунёда футболга янада кўпроқ жалб қилиш мақсадида Жаҳон чемпионати иштирокчилари сонини 64 та миллий жамоагача кенгайтириш имкониятларини аллақачон ўрганиб чиқдик. Ушбу масала FIFA Кенгашига топширилди, аммо ҳозирча, келинг, 48 та жамоа иштирокида ўтаётган ушбу илк турнирдан завқ олайлик. 64 та терма жамоа бўлса, эҳтимол, Италия саралашдан ўта олган бўларди… ҳатто уларнинг иштирокини кафолатлаш учун жамоалар сонини 208 тага етказишимиз ҳам мумкин эди», — деди Инфантино.
