Жанни Инфантино Дональд Трампнинг нима сабабдан ЖЧ-2026 ўйинларига келмаётганини тушунтирди
FIFA президенти Жанни Инфантино АҚШ президенти Дональд Трамп нима учун футбол бўйича ЖЧ-2026 учрашувларига ташриф буюрмаётганига ойдинлик киритди.
— Ҳа, биз мунтазам равишда алоқада бўлиб турибмиз. Деярли ҳар куни. У турнирдан мамнун ва ундан катта завқ олмоқда. Барча ўйинларни телевизор орқали томоша қиляпти.
— У нима учун ҳалигача стадионда кўриниш бермади? Хавфсизлик билан боғлиқ масалалар ҳаддан ташқари кўпми?
— Йўқ, йўқ. Ўйлашимча, унинг шунчаки бошқа қиладиган ишлари ҳам бор… Агар у стадионга келса, одамлар: «Дунёда шунча воқеалар содир бўлаётган бир пайтда у стадионда нима қиляпти?» деб сўрай бошлашади. Мен у ва унинг администрацияси билан доимий алоқадаман. Менинг фикримча, унинг жамоаси Жаҳон чемпионатини ташкил этиш ишларини аъло даражада уддаламоқда, — дея Инфантинонинг сўзларини келтирмоқда Bluewin нашри.
Маълумот учун, 2026-йилги Жаҳон чемпионати 11-июндан 19-июлга қадар АҚШ, Канада ва Мексика ҳудудларида бўлиб ўтмоқда. Финал учрашуви Ист-Ратерфордда (АҚШ) ўтказилади. Амалдаги чемпион Аргентина терма жамоаси ҳисобланади.
