Ўзбекистон U-23 терма жамоаси назорат ўйинида Хитойга имкониятни бой берди
Баҳс Хитойнинг Далян шаҳридаги спорт мажмуасида ёпиқ эшиклар ортида ўтказилди.
Фото: Getty Images
Ўзбекистон U-23 терма жамоаси Осиё ўйинлари олдидан ўтказилган назорат учрашувида Хитой U-23 жамоасига 0:2 ҳисобида мағлуб бўлди. Баҳс Хитойнинг Далян шаҳридаги спорт мажмуасида ёпиқ эшиклар ортида ўтказилди.
Учрашувда мезбонлар 28-дақиқада ҳисобни очди. Иккинчи бўлимнинг 83-дақиқасида эса Хитой яна бир гол уриб, якуний ҳисобни 2:0 кўринишига келтирди.
Равшан Ҳайдаров бошчилигидаги Ўзбекистон U-23 терма жамоаси ушбу баҳс орқали 2026 йилги Осиё ўйинлари олдидан сўнгги тайёргарлик жараёнини ўтказди. Терма жамоа 1 сентябрдан буён мусобақага ҳозирлик кўриб келмоқда.
Маълумот учун, Ўзбекистон Осиё ўйинларида “C” гуруҳидан жой олган. Жамоамиз 15 сентябрь куни Филиппин, 18 сентябрда Қувайт ва 22 сентябрда Вьетнамга қарши майдонга тушади.
