Ўзбекистон терма жамоаси олдидаги синовлар: мусобақа арафасида муаммолар кўпаймоқда
30-август куни Тошкентда халқаро турнир старт олади. Ўзбекистон терма жамоаси гуруҳ босқичида Уммон, Туркманистон ва яна бир минтақавий рақиб билан тўқнаш келади. Бироқ мусобақа яқинлашар экан, жамоа олдида бир қатор жиддий масалалар турибди.
Қаерда ўйнаймиз?
Энг катта савол стадионлар билан боғлиқ. «Бунёдкор» майдони концертдан кейин ёриқ ҳолатга келган. «Пахтакор»да газон ҳали тайёр эмас, «Локомотив»да таъмир давом этмоқда. Ҳозирча ягона имконият — «Жар» стадиони. Бироқ август ойида бу ердаги юклама жуда катта, бу эса газон сифатини жиддий йўқотиши мумкин. Кўплаб мухлислар мусобақани вилоятларда ўтказиш керак эди, деб ҳисобламоқда.
Жароҳатлар ва ўйин амалиёти етишмаслиги
Шу билан бирга, таркиб масаласи ҳам муаммоли. Жамоа етакчиларидан айримлари жароҳат олган ёки ҳали тўлиқ формага кирмаган. Рустам Ашурматов бир неча ойга сафдан чиққан. Жалолиддин Машарипов тикланиш жараёнида, аммо турнирга етиб келиш умиди бор. Остон Урунов мавсум бошида жамоага қўшилди, лекин ҳали майдонга тушмади. Отабек Шукуров индивидуал тартибда машғулот ўтказмоқда.
Легионерларда ҳам қийинчиликлар йўқ эмас: Аббосбек Файзуллаев июндан бери тўлиқ ўйин ўтказмаган ва «Башақшеҳир» сафида ҳали дебют қилмади. Дарвозабон Уткур Юсупов эса Эрон чемпионатида асосий таркибда ўйнамай қолди, маҳаллий матбуот унинг бошқа клубга ўтиши мумкинлигини ёзмоқда.
Мураббий масаласи
Жамоа атрофида яна бир ноаниқлик — Тимур Кападзенинг келажаги. Унинг шартномаси ноябргача амал қилади. Чет эллик мураббийлар номзоди атрофида турли хабарлар тарқалди, аммо УФА бу ҳақда расмий изоҳ бермаган.
Шундай қилиб, терма жамоа мусобақага бир қатор муаммолар билан кириб келмоқда. Шунга қарамай, футболчилар мухлисларни хурсанд қилиш ва юртимиз шарафини муносиб ҳимоя қилиш ниятида майдонга чиқишади.
