Ўзбекистон терма жамоаси мураббийи Қозоғистонга омад тилади
Ўзбекистон миллий терма жамоаси бош мураббийи Тимур Кападзе BorodAbata.kz нашрига берган интервьюсида жаҳон чемпионати-2026 саралаш босқичида қўллаб-қувватлагани учун қозоғистонлик футбол ишқибозларига миннатдорчилик билдирди. Унинг сўзларига кўра, Ўзбекистон термаси мундиалга йўлланма олганидан сўнг Қозоғистондан кўплаб табриклар ва илиқ тилаклар олган.
— Ростдан ҳам Қозоғистондан жуда кўп табриклар келди. Мен ушбу мамлакатда унугмас фурсатларни ўтказганман. Қозоғистонда дўстларим жуда кўп. Мамлакатингизга қўллаб-қувватлагани учун катта раҳмат айтаман. Ахир биз — қариндош халқлармиз. Қозоғистон терма жамоаси ва қозоқ футболига омад тилайман. Улар ҳам мухлисларини хурсанд қилсин, — деди Кападзе.
Эслатиб ўтамиз, Сречко Катанец кетганидан сўнг терма жамоа бошқарувини Тимур Кападзе қабул қилиб олган ва жамоани тўғридан-тўғри жаҳон чемпионатига олиб чиқишга муваффақ бўлган. У ўйинчи сифатида Қозоғистоннинг «Актобе» клубида тўп сурган ва жамоа тарихида муҳим из қолдирган.
