Ўзбекистон Суперкубоги-2026. Андижон ўйинга мезбонлик қилади
Узоқ танаффусдан кейин Суперлига чемпионлигини қўлга киритган “Нефтчи” ҳамда мамлакат кубогининг амалдаги ғолиби “Пахтакор” ўртасидаги Суперкубок ўйини Андижонда ўтказилади.
Тақвим режасига кўра, Суперкубок беллашуви 15-март куни бўлиб ўтади. Сўнгги йилларда Лига Суперкубок учрашувини май ойида ўтказиб келаётган эди. Бироқ мамлакат бош жамоаси Жаҳон кубогида иштирок этадиган мавсумда мухлислар учун муҳим бўлган супер учрашув март ойига режалаштирилди.
Суперкубок ўйинига Олмалиқ ёки Наманган шаҳарларидаги стадионлар ҳам мезбонлик қилиши мумкин эди. Бироқ ОКМК ва Марказий стадионларида таъмирлаш ишлари давом этмоқда ва уларнинг қайта иш бошлаш саналари аниқ эмас. Шуни ҳисобга олган ҳолда, Андижондаги Бобур Арена варианти энг мақбул деб топилди.
Бобур Арена кетма-кет иккинчи мавсум катта футбол учрашувига мезбонлик қилади. Бир йил муқаддам Ўзбекистон кубогининг финал учрашуви тарихда илк бор Андижонда ўтказилган эди. Қайд этиш керакки, вилоят ҳозирга қадар Суперкубок ўйинига мезбонлик қилмаган ва мазкур воқелик ҳам Бобур Арена учун биринчи ҳисобланади.
