“Ювентус” Виржил ван Дейкка қизиқиш билдирмоқда
“Ливерпуль” сардори Виржил ван Дейк фаолиятини Италияда давом эттириши мумкин. La Gazzetta dello Sport маълумотига кўра, “Ювентус” 35 ёшли марказий ҳимоячининг ҳолатини кузатишни бошлаган ва уни 2027-йил ёзги трансфер ойнаси учун номзодлар қаторига киритган.
Турин клуби вакили яқинда Нидерландия ва Германия терма жамоалари ўртасидаги 1:1 ҳисобида якунланган учрашувни стадиондан кузатган. “Ювентус” вакиллари ван Дейкнинг терма жамоа даражасидаги ҳозирги жисмоний ҳолатини баҳолашни истаган. Ҳозирча томонлар ўртасида ҳеч қандай музокара ўтказилмаган.
Ван Дейкнинг “Ливерпуль” билан амалдаги шартномаси 2027-йил июнида якунланади. Шу сабаб ҳимоячи мавсум охирида эркин агентга айланиши мумкин. “Ювентус” футболчининг тажрибаси, етакчилик фазилатлари ва ғолиблик менталитетини юқори баҳоламоқда, бироқ унинг ёши сабаб жисмоний ҳолатига алоҳида эътибор қаратмоқда.
Маълумот учун, ван Дейк “Ливерпуль” сафида 2018-йилдан буён тўп тепиб келмоқда ва клуб либосида 380 га яқин учрашув ўтказган. “Ювентус” ҳимоячини Глейсон Бремер ёзда жамоани тарк этадиган бўлса, марказий ҳимояни кучайтириш вариантларидан бири сифатида кўриб чиқмоқда.
