«Ювентус» ва «Милан» ўзаро футболчи алмашиши мумкин — Tuttosport
Туринликлар яримҳимояни кучайтиришга жиддий эътибор қаратмоқда.
ФОТО: Getty Images
Туриннинг «Ювентус» клуби трансфер бозоридаги ишларини давом эттириб, яримҳимоя чизиғини кучайтиришга жиддий эътибор қаратмоқда. Tuttosport нашрининг хабар беришича, «Милан» яримҳимоячиси Рубен Лофтус-Чик «Кекса Синьора»нинг асосий трансфер мақсадларидан бирига айланган.
Манбада таъкидланишича, «Ювентус» Лофтус-Чикни анчадан бери кузатиб келмоқда ва ҳозирда футболчилар алмашинуви варианти муҳокама қилинмоқда. Ушбу режа доирасида туринликлар ҳимоячиси Федерико Гатти «Милан»га йўл олиши, Лофтус-Чик эса Турин клубига кўчиб ўтиши мумкин.
Жорий мавсумда Рубен Лофтус-Чик «россонерилар» сафида 20 та учрашувда майдонга тушиб, 1 та гол ва 1 та голли узатма муаллифига айланган. Футболчининг «Милан» билан амалдаги шартномаси 2027 йилгача мўлжалланган.
Насрулло Каримов
Журналист