«Ювентус» «Тоттенхэм» дарвозабонини ўз сафида кўришни истамоқда
Туриннинг «Ювентус» клуби «Тоттенхэм» дарвозабони Гульелмо Викарио хизматларига жиддий қизиқиш билдирмоқда. La Gazzetta dello Sport нашрининг хабар беришича, «кекса синьора» италиялик посбонни ёзги трансферлар ойнасида ўз сафида кўриш имкониятини ўрганмоқда.
Лондонликлар 29 ёшли дарвозабонни тахминан 25 миллион евро бағоламоқда. «Ювентус» раҳбарияти агар қулай имконият пайдо бўлса, Викариони манфаатли шартлар асосида сотиб олишга тайёр.
Шунингдек, туринликлар ўз дарвозабони Микеле Ди Грегориони сотиб юбориш эҳтимолини ҳам инкор этмаяпти — ҳозирда унга Англия Премьер-лигасининг бир нечта клубларидан қизиқиш мавжуд.
Викариони нафақат «Ювентус», балки Миланнинг «Интер» клуби ҳам ўз радаридан чиқармаяпти. Ҳар икки гранд жамоанинг ушбу посбонга қизиқиши унинг Италия терма жамоаси аъзоси эканлиги ва маҳаллий лицензияга эга эканлиги билан ҳам боғлиқ.
Эслатиб ўтамиз, Гульелмо Викарио 2023 йилда «Эмполи»дан 18 миллион евро эвазига «Тоттенхэм»га ўтган эди. Унинг «шпорлар» билан амалдаги шартномаси 2028 йил июнига қадар мўлжалланган. Жорий мавсумда дарвозабон барча мусобақаларда 36 та учрашувда майдонга тушиб, 48 та гол ўтказиб юборди ва 13 та ўйинда ўз дарвозаси дахлсизлигини сақлаб қолди.
