«Ювентус» Матетага қизиқиш билдирмоқда
«Кристал Пэлас» ҳужумчиси Жан-Филипп Матета фаолиятини Италияда давом эттириши мумкин.
Журналист Экрем Конурнинг ижтимоий тармоқдаги маълумотига кўра, франциялик футболчини ўз сафига қўшиб олишга «Ювентус» қизиқиш билдирмоқда.
Турин клуби форварднинг трансферини шу ёзда расмийлаштиришни режалаштирмоқда. Шунингдек, «Ювентус» «Пари Сен-Жермен» ярим ҳимоячиси Рандаль Коло Муани билан ҳам шартнома имзоламоқчи.
Жан-Филипп Матета 2022 йилда 11 миллион евро эвазига «Майнц»дан «Кристал Пэлас»га ўтган. Унинг инглиз клуби билан шартномаси 2027 йилнинг июнигача мўлжалланган.
2025/2026 йилги мавсумда ҳужумчи «Кристал Пэлас» сафида барча турнирларда 50 та ўйинда майдонга тушиб, 16 та гол урди ва учта голли узатмани амалга оширди. Transfermarkt портали Матетанинг нархини 35 миллион еврога баҳоламоқда.
