«Ювентус» «Барселона»нинг собиқ футболчисини ўз сафига қўшиб олмоқчи
«Барселона» ва «Милан» клубларининг собиқ юлдузи, айни дамда Саудия Арабистонининг «Ал Ахли» жамоаси шарафини ҳимоя қилаётган Франк Кесси яна Италия А Сериясига қайтиши мумкин. Tuttosport нашри тарқатган хабарга кўра, Туриннинг «Ювентус» клуби футболчини «кекса синьора» сафига ўтказишга жиддий бел боғлаган.
Туринликлар 29 ёшли яримҳимоячига йилига 5 миллион евро маош билан уч мавсумга мўлжалланган шартнома таклиф қилишган. Бироқ Жидда клуби ҳам қараб тургани йўқ: «Ал Ахли» раҳбарияти Кессини жамоада олиб қолиш учун амалдаги келишувни яна икки йилга узайтириш ниятида.
Франк Кесси 2023/2024 йилги мавсумдан буён Саудия Арабистонида тўп суриб келмоқда. Жорий мавсумда ивуарлик футболчи барча турнирларда 22 та ўйинда майдонга тушиб, 7 та гол ва 3 та голли узатмага муаллифлик қилди.
Унинг клуб билан амалдаги шартномаси 2026 йилнинг июнига қадар амал қилади. Transfermarkt портали тажрибали таянч яримҳимоячисининг бозор қийматини 12 миллион евро деб баҳоламоқда.
