«Ювентус» Алиссон Беккер трансфери бўйича «Ливерпул»га таклиф тайёрламоқда
Италиянинг «Ювентус» клуби бразилиялик дарвозабон Алиссон Беккернинг трансфери борасида Англиянинг «Ливерпул» жамоасига биринчи расмий таклифни тайёрламоқда. Бу ҳақда журналист Николо Скира маълум қилди.
«Алиссон Беккернинг «Ювентус»га ўтиши бўйича музокаралар олиб борилмоқда. Лучано Спаллетти бразилиялик дарвозабонни сотиб олишни талаб қилмоқда. Футболчи учун 2029 йилгача мўлжалланган шартнома (йилига 5 миллион евро маош билан) тайёр. Алиссон «Ювентус»га ўтишга қизиқиш билдираётганга ўхшайди, Турин клуби эса яқин ҳафталарда «Ливерпул» учун биринчи таклифни юбормоқчи», — деб ёзди Скира.
Маълумот учун, Англия Премьер-лигасининг жорий мавсумида 33 ёшли Алиссон Беккер 25 та ўйинда майдонга тушди. Шунингдек, унинг ҳисобида Чемпионлар Лигасида ўтказилган олти учрашув ҳам бор.
