Юрген Клопп: «Мен «Энфилд» муҳитини соғинаман, лекин ҳозирги ҳаёт тарзимдан мамнунман»
«Ливерпул» клубининг собиқ бош мураббийи Юрген Клопп Англиядаги фаолияти ва «Энфилд» стадионидаги ўзига хос муҳит ҳақидаги хотиралари билан ўртоқлашди. Германиялик мутахассис TV2 телеканалига берган интервьюсида ўзининг ҳозирги ҳаёти ва мураббийликдан кейинги ўзгаришлар ҳақида тўхталиб ўтди.
«Мен ҳар куни „Энфилд“ муҳити менга зудлик билан керак, деган фикр билан уйғонмайман, аммо уни соғинаман. Менга у ерда ишлаш жуда ёқар эди. Мен меҳнат қилишни яхши кўраман ва доим ҳаракатдаман. Бироқ ҳозир ҳаммаси бошқача: уч кун ишлаб, кейинги тўрт кун давомида ҳеч нарса қилмаслигим мумкин. Бу мен учун ҳозиргача бўлган энг яхши тартибдир», — дейди Клопп.
Мутахассиснинг таъкидлашича, у табиатан ҳаракатсиз ўтиришга мослашмаган, бироқ дам олиш ва иш ўртасидаги мувозанатни топиш унга янги куч бағишлаган:
«Мен шунчаки бекорчи бўлиш учун туғилмаганман. Лекин ҳаётдан кўпроқ нарсани олиш йўлини топишим керак эди».
Эслатиб ўтамиз, Юрген Клопп айни дамда «Red Bull» тизимидаги футбол департаменти раҳбари лавозимида фаолият юритмоқда. У ушбу лавозимда компания тасарруфидаги клубларнинг стратегик ривожланиши ва футбол лойиҳаларини мувофиқлаштириш билан шуғулланади.
