Юрген Клопп: «Ливерпуль» энди янги мураббий биланҳаммасини қайтадан бошлаши мумкин
«Ливерпуль»нинг собиқ бош мураббийи Юрген Клопп жамоанинг ўтган мавсумдаги ҳолати ҳамда клубга янги мураббий Андони Ираола келгани ҳақида фикр билдирди.
Немис мутахассиси ўтган мавсумда «Ливерпуль»да нега барқарорлик етишмаганини аниқ баҳолаш қийинлигини таъкидлади. Клоппнинг айтишича, у ҳозир клуб ичидаги жараёнларга етарлича яқин эмас ва шунинг учун муаммолар ҳақида кескин хулоса чиқаришни истамайди.
Шу билан бирга, Клопп «Ливерпуль» аввалги мавсумда чемпионликни қўлга киритганидан хурсанд бўлганини айтди. Унинг фикрича, кейинги мавсум клуб учун осон кечмаган, бироқ шунга қарамай жамоанинг Чемпионлар лигасига йўл олгани муҳим натижа бўлган.
Клоппнинг таъкидлашича, энди «Ливерпуль» янги бош мураббий билан ҳаммасини деярли бошидан бошлаши мумкин. У Андони Ираолани сифатли мутахассис деб атади ва янги мураббийга жамоа билан ишлаш, футболчилар билан ўзаро тушуниш ҳосил қилиш учун вақт керак бўлишини қайд этди.
Шунингдек, собиқ мураббий футбол клубларида кутилмаган ҳолатлар бутун мавсумга таъсир қилиши мумкинлигини ҳам эслатди. Клопп ўтган мавсум «Ливерпуль» учун ҳиссий жиҳатдан ҳам мураккаб бўлганини тан олиб, энди клуб орқага эмас, келажакка қараши кераклигини айтди.