Юрген Клопп Германияда янги футбол лигасини ташкил қилмоқчи
«Ливерпуль»нинг собиқ устози, айни дамда «Red Bull» тизимида глобал футбол бўлими раҳбари сифатида фаолият юритаётган Юрген Клопп немис футболи пойдеворини тубдан ўзгартрадиган лойиҳа устида ишламоқда. Bild нашрининг хабар беришича, Клопп Германияда янги футбол лигасини ташкил этиш режаларини тузмоқда.
Клоппнинг мақсади — ёш иқтидорларга Бундеслигага ўтишдан олдин зарур тажриба тўплаш имконини берадиган U21 лигасини яратишдир. Бу лойиҳада унга Маркус Кёше, Сами Хедира, Андреас Реттиг ва Марк Ленс каби таниқли мутахассислар ҳамроҳлик қилмоқда.
Бундай ташаббусга немис футболидаги оғриқли нуқта — ёш истеъдодларнинг асосий жамоаларга йориб кириши ҳаддан ташқари қийинлашиб кетгани сабаб бўлган.
Ташкилотчилар амалдаги тизимнинг бир қатор ачинарли камчиликларини очиб беришди: бугунги кунда Европанинг энг сермаҳсул 100 та академияси рўйхатига Германиянинг атиги 9 та мактаби кира олган, холос. Бундан ташқари, Бундеслига «кучли бешлик» лигалари ичида ўз тарбияланувчиларига энг кам имконият берадиган чемпионатга айланиб қолган — олий дивизиондаги жами ўйин вақтининг 85 фоизи академиялардан чиқмаган футболчилар ҳиссасига тўғри келмоқда.
Клопп ва унинг жамоаси айнан шу муаммоларни бартараф этиш орқали Германия футболининг келажагини қутқариб қолишни кўзлаган.
