Юрген Клопп Германия терма жамоаси бош мураббийи этиб тайинланади — манба
Герман мутахассиси Юрген Клопп Германия миллий терма жамоасини бошқариши аниқ бўлди. Томонлар ўртасидаги келишув 2030 йилги Жаҳон чемпионатига қадар мўлжалланган. Германия футбол иттифоқи (DFB) ва Клопп 2025 йилдан буён фаолият юритиб келаётган "Red Bull" компанияси меҳнат шартномасини бекор қилиш бўйича ўзаро принципиал келишувга эришдилар. Бу ҳақда инсайдер журналист Флориан Плеттенберг ўзининг X ижтимоий тармоқдаги саҳифасида хабар берди.
Манбанинг маълум қилишича, Клопп ва унинг тижорий ҳамкорларига тегишли шартноманинг якуний тафсилотлари бугун бўлиб ўтадиган ЖЧ-2026 финалидан сўнг ёзма равишда расмийлаштирилади. Режага кўра, 59 ёшли мутахассис келаси жума куни, яъни 24-июлда Франкфуртда расмий шартнома имзолайди. Айни ўша куни DFB ушбу тайинловни оммага эълон қилади ва матбуот анжумани ташкил этилади.
Эслатиб ўтамиз, Юрген Клопп 2025 йилдан буён "Red Bull" компаниясида халқаро алоқалар бўйича директор лавозимида ишлаб келаётган эди ва унинг шартномаси 2029 йил якунига қадар тузилган эди. Ушбу фаолиятидан аввал эса мутахассис 2015 йилдан 2024 йилгача Англиянинг "Ливерпул" клубини бошқарган.
