Yurgen Klopp Germaniya terma jamoasi bosh murabbiyi etib tayinlanadi — manba
Germaniyalik mutaxassis Yurgen Klopp Germaniya milliy terma jamoasini boshqaradigan bo‘ldi. Tomonlar o‘rtasidagi kelishuv 2030-yilgi Jahon chempionatiga qadar mo‘ljallangan. Germaniya futbol ittifoqi (DFB) va Klopp 2025-yildan buyon faoliyat yuritib kelayotgan "Red Bull" kompaniyasi mehnat shartnomasini bekor qilish bo‘yicha o‘zaro prinsipial kelishuvga erishdilar. Bu haqda insayder jurnalist Florian Plettenberg o‘zining X ijtimoiy tarmoqdagi sahifasida xabar berdi.
Manbaning ma’lum qilishicha, Klopp va uning tijoriy hamkorlariga tegishli shartnomaning yakuniy tafsilotlari bugun bo‘lib o‘tadigan JCh-2026 finalidan so‘ng yozma ravishda rasmiylashtiriladi. Rejaga ko‘ra, 59 yoshli mutaxassis kelasi juma kuni, ya’ni 24-iyulda Frankfurtda rasmiy shartnomaga imzo chekadi. Aynan o‘sha kuni DFB ushbu tayinlovni ommaga e’lon qiladi va matbuot anjumani tashkil etiladi.
Eslatib o‘tamiz, Yurgen Klopp 2025-yildan beri "Red Bull" kompaniyasida xalqaro aloqalar bo‘yicha direktor lavozimida ishlab kelayotgan edi va uning shartnomasi 2029-yil yakuniga qadar tuzilgandi. Ushbu faoliyatidan avval esa mutaxassis 2015-yildan 2024-yilgacha Angliyaning "Liverpul" klubini boshqargan.
